CENTRAL VISAYAS-Nakatala ang buhatan sa Department of Health – Central Visayas (DOH-7) og 19 ka kaso sa fireworks-related injuries ug 54 ka road traffic-related injuries karong holiday season.
Ang ahensya sa panglawas nag-ingon nga kini natala tali sa Disyembre 21 hangtod 26 nga nag-awhag sa publiko nga unahon ang kaluwasan samtang nagpadayon ang pagsaulog sa holiday.
Niadtong Huwebes, Disyembre 26, walo ka bag-ong fireworks-related injuries ang natala, hinungdan nga niabot na sa 19 ang kinatibuk-an sukad nagsugod ang pagmonitor sa DOH-7.
Ang mga ilegal nga pabuto sama sa lantaka, 5-Star, ug Piccolo maoy gitumbok nga nag-unang hinungdan.
Nanawagan ang DOH-7 sa mga komunidad nga i-report ang mga nagagamit o namaligya sa mga gidili nga mga pabuto ug gitambagan nga likayan ang pagdumala o pagpasiga sa wala pa mobuto nga mga pabuto nga makit-an sa kadalanan.//
Gawas sa mga insidente sa pabuto, ang traffic-related injuries mikabat sa 54 ka mga kaso sa samang panahon, diin 13 ka mga bag-ong kaso ang gitaho niadtong Disyembre 26 sa Vicente Sotto Memorial Medical Center, ang sentinel hospital sa rehiyon alang sa road traffic injuries.
Aron matubag kini, giawhag sa DOH-7 ang mga motorista nga susihon ang ilang mga sakyanan gamit ang “BLOW-BAG-SET” safety checklist, pagsiguro nga maayo ang kahimtang sa brake, suga, lana, tubig, baterya, accessories, gas, electrical system, ug ligid sa dili pa mobiyahe.
Aron malikayan ang dugang kadaot, giawhag sa DOH ang publiko nga luwas nga magselebrar pinaagi sa paggamit sa mga alternatibo sa pabuto, sama sa mga torotot, kaldero, o pagkanta sa karaoke uban sa pamilya ug mga higala.
