CEBU CITY – Hingpit na nga gi-ablihan ang Mambaling underpass kaganihang buntag kung diin daghan sa mga motorista ang naghinam-hinam nga mulabay sa maong dalan.
Gipahibalu ni Francisco Ouano, Operations Head sa Cebu City Transportation Office (CCTO) aduna lang sila’y nasugatan nga ginagmay nga problema sama sa diriyut nga paghinay sa dagan sa trapiko apan giingung dali lang kini nila nga nasulosyunan.
Matud pa nga ang mga pribado ug pangpubliko nga sakyanan ang mamahimung makaagi sa maong two-lane underpass.
Apan giklaru ni Ouano nga mas maayu nga mu-agi ang mga PUJs nga punu na sa underpass, samtang ang wala pa mapunu sa pasahero ang mu-agi una sa side road.
Dugang pa, ang mga bus nga mubyahe sa habagatan nga bahin sa Sugbo ang mamahimu usab nga mu-agi sa maong underpass.
Samtang, nanghinaut lang si Ouano nga musunud lang usab ang mga drayber sa lagda sa trapiko arun nga malikay usab ang traffic sa nahisgutang dapit.
