CEBU CITY — Patay ang kanhi-mayor sa Medellin, Cebu human girombo sa mga armadong lalaki ang iyang lawak sa sulod sa usa ka tambalanan sa maong lungsod.
Naputos sa samad-pinusilan ang 55 anyos nga si Ricardo “Ricky” Ramirez sa sulod sa iyang CR sa Bogo-Medellin Corporation Medical Center.
Sa pagpakighinabi sa Bombo Radyo ngadto ni Police Master Sgt. Winston Isnani sa Medellin Police Station, kini nagkanayon nga gidis-armahan sa dili moubos sa 10 ka mga kalalakin-an nga naka-bonnet ang mga guard on duty ug BJMP personnel nga nagbantay sa kanhi mayor.
Matud ni Isnani nga gipahupo sa mga armadong kalalakin-an ang mga hospital staff ug nakuhaan og mga cellphone aron walay makakuha og hulagway sa krimen.
Dugang pa ni Isnani nga midagan dayon si Ramirez sa pansayan ug mitago dayon human makadungog og mga pagbuto gikan sa pultahan.
Giingong gipaarakan si Ramirez nga miresulta sa hinanaling kamatayon samtang misibat diretso ang armadong mga lalaki.
Samtang luwas usab ang mga hospital staff human sa maong krimen.
Padayon usab nga giimbestigaran sa SOCO team ang pagkamatay ni Ramirez aron masuta ang motibo niini.
Nasayran nga nasikop si Ramirez niadtong 2017 tungod sa kasong illegal possesion of firearms ug gipaubos kini sa hospital arrest tungod sa pagpanakit sa iyang dughan.
