NADAKPAN ang usa ka high value target human nakuhaan og kapin sa usa ka milyon ka pesos nga balor sa ginadiling drugas atol sa gipahigayong buybust operation sa Brgy. Labogon, dakbayan sa Mandaue.
Giila ang dinakpan nga si Carlo Alfanta, 22 anyos, ug residente sa nahisgutang dapit.
Matud sa hepe sa Basak Police Station nga si Police Captain James Conaco nga napahigayon ang maong operasyon human makadawat og sumbong gikan sa usa ka concerned citizen mahitungod sa iligal nga kalihukan ni Alfanta. Nasikop usab ang laing upat nga giingong kauban sa maong dinakpan atol sa operasyon.
Nasakmit sa kapulisan ang 120 ka gramos sa gidudahang shabu ug nagkantidad kini og P1,032,000.
Samtang gironda sa mga sakop sa Provincial Intelligence Branch (PIB) ang usa ka drug den sa Sitio San Miguel, Brgy. Linao, sa dakbayan sa Talisay.
Sikop ang mga dinakpan nga silang Maclin Menija, Jake Menija, Jomar Barliso, Rolando Rocaberte, Juncel Villejo, Eric Vistal, Christian Regis, Welbert Cañedo, ug Rose Marie Omagbon.
Matud sa hepe sa PIB nga si Police Lieutenant Colonel Marlu Conag nga gipanag-iya ni Maclin Maneja ang maong drug den diin gipaubos nila kini sa usa ka buwan nga surveillance.
Dugang pa ni Conag nga usa ka high value target sa probinsya ang usa sa mga dinakpan nga si Barliso.
Nakuhaan ang mga dinakpan og mga pinaketeng shabu diin mitimbang kini og 20 gramos ug adunay DDB value nga P136,000.
Anaa sa detention cell sa Cebu Provincial Police Office ang mga dinakpan ug mag-atubang og kasong kalapasan sa Comprehensive Dangerous Drugs Act.
Nabalhog sa prisuhan ang maong dinakpan ug mag-atubang og kasong may kalambigitan sa ilegal nga drugas.
