CEBU CITY — Aduna nay ipanghatag nga passenger boarding pass sa Cebu South Bus Terminal (CSBT) kun ugaling modagsa ang mga pasahero ilabi na sa adlaw nga Biyernes ug Sabado.
Matud ni CSBT Manager Carmen Quijano nga padayon gihapon ang “no ticket no entry policy” apan adunay opsyon o lain nga pamaagi kun ugaling modaghan pag-ayo ang mga pasahero.
Subay na kini sa nag-viral nga video sa social media kung diin makita nga nagtapok ang katawhan sa ticketing area gumikan di man makasulod sa maong terminal ug walay ticket.
Matod pa usab ni Quijano nga adunay ipanghatag nga passenger boarding pass ang tagsa-tagsa ka mga bus kung diin sila na ang muhatag sa pasahero sa panahon nga tingsakay.
Kung diin makasulod na ang mga pasahero sa terminal ug makalingkod na samtang nagpaabot ug bus.
Pinaagi niini, gisiguro gihapon ang kaluwasan sa katawhan nga di makasulod ang mga adunay dautang tuyo sulod sa terminal ug ingon man ang kahapsay usab.
Gihimug-atan usab sa CSBT manager nga kun aduna may kasaypanan sa terminal siya ang angay nga sawayon ug dili ang gobernador. (Lahvi Quiñones)
