DAANBANTAYAN, Cebu – Gipang-apud-apud na sa lokal nga kagamhanan sa Daanbantayan Cebu ang mga hinabang alang sa mga nabiktima sa bagyong Ursula.
Gipahibalo ni Daanbantayan Mayor Sun Shimura nga gisugdan na nila karung adlawa ang paghatag ug mga trapal, marine plywoods sa isla sa Carnaza ug Malapascua kinsang mga mananagat ang hilabihan nga naapektohan sa pagkuso-kuso sa bagyo.
Lakip sa ilahang gipang-apud-apud mao ang mga canned goods.
Giingong ang mga plywood ang makatabang nga subling makapanday pagbalik ang mga mananagat sa ilahang mga nangaguba nga bangka.
Samtang, mao usab ang ilahang gihatag nga hinabang sa mga typhoon victims nga anaa sa ‘mainland’.
Sa bahin usab sa agrikultura, gipahibalo ni Mayor Shimura nga mupalit sila ug 900 ka mga sako sa ‘corn crops’ diin mao ang hilabihan nga nagusbat sa habig sa mga mag-uuma diin mikabat sa P4.4 million ang danyos.
Nasayran nga 4,000 ka mga food packs ang gipang-apud-apud sa Carnaza Island diin masigo kini sulod sa unom ka adlaw nga pagkaon sa matag pamilya.
