Gisiguro karon sa Cebu Provincial Veterinary Office ang hugot nga seguridad sa tanang mga pantalan sa lalawigan sa Sugbo aron dili makasulod ang mga buhing baboy ug pork products gikan sa mga lugar nga naigo sa African Swine fever (ASF) virus.
Matud ni Provincial Veterinarian Dra. Mary Rose Vincoy nga nagpabiling hugot ang lagda batok sa ASF taliwa sa awhag sa Department of Agriculture (DA) nga kinahanglang mosunod sa national zoning.
Gibantayan karon sa mga veterinarian ang tanang mga pantalan aron sa pag-inspect sa mga mosulod nga mga pork ug pork products.
Gumikan sa kakuwang, nagpa-augment ang kagamhanan sa lalawigan og mga sakop aron mahimong animal quarantine inspector.
Kini aron nga magpabiling round the clock ang pagbantay ug aron usab malikayan ang pagsulod sa mga pork products gikan sa Luzon ug Mindanao.
Mipahigayon na usab ang mga local government units ug regular nga checkpoints alang sa mga mo-abot nga baboy ug pork products sa pantalan. (with reports by Bombo Eric Amaro/gn)
