CEBU CITY — Ni-awhag si Presidente Rodrigo Duterte sa mga myembro sa Association of Southeast Asian Nations (ASEAN) nga pangandaman og sayo ang posibleng outbreak sa COVID-19 sa kalibutan.
Sa virtual Special ASEAN Summit on COVID-19, mipadayag ang presidente nga kinahanglang mohimo og early warning system sa rehiyon.
Matud ni Duterte nga angayang palapdan ug palambuon ang mekanismo sa ASEAN aron masulbad ang public health emergencies.
Dugang pa niini nga angayan pang palambuon ang kooperasyon ug panaghiusa sa mga nasud sa Southeast Asia taliwa sa COVID-19 crisis kung hisgutan ang produksyon sa medical supplies, food security, ug edukasyon.
Sumala pa sa pangulo nga ang food security maoy yawi aron mamentenar ang socio-economic ug political stability.
Samtang nagpasalamat usab si Duterte sa Brunei Darussalam ug Singapore sa hinabang nga gihatag ngadto sa Pilipinas.
Nag-una ang Pilipinas sa COVID-19 cases sa tibuok ASEAN region diin aduna kini 5,223 confirmed cases.
Sa maong ihap, 295 na ang naayo apan 335 usab ang namatay.
Gisundan kini sa mga nasud nga Malaysia, Indonesia, Singapore, ug Thailand diin linibo usab ang nataptan sa makamatay nga virus.
