CEBU CITY — Nahimong emosyonal si Cebu City Mayor Edgardo Labella human gilusad ngadto sa publiko ang halapad nga Cebu City Quarantine Center sa North Reclamation Area sa dakbayan.
Kini human nga gibendisyunan ang tibuok pasilidad nga nahimutang sa Block 27 kung diin diha ibutang ang mga COVID-19 patients nga adunay mild ug moderate nga sintomas.
Gisiguro gayud ang kaluwasan sa tanang mga pasyente ug sa mga nagpalibut niini tungod kay aduna kini negative pressure system nga maoy maglikay sa kontaminasyon sa virus.
Pagadumalaon usab sa City Health Department ug sa Cebu City Medical Center ang halapad nga quarantine center kauban ang mga volunteer doctors.
Gipasalamatan ni Labella ang tanang mga opisyal sa dakbayan, mga department heads, lakip na ang pribado ug pampubliko nga sektor human nga nahimong katumanan ang maong pasilidad diin gigahinan kini og P100-million gikan sa pondo sa dakbayan.
Matud ni Labella nga likayan ang panagbingkil ug maghiusa ang tanan aron pakgagon ang maong global pandemic.
Gawas sa maong quarantine facility, andam na usab ang 19 ka mga Barangay Isolation Centers alang sa mga positive asymptomatic patients.
Samtang nakapwesto na ang Cebu City Crisis Management Team ug Cebu City Command Center alang sa mas gipahugot nga pagbantay batok sa makamatay nga virus.
