Ipatuman ang mga minimum nga public health protocols sa mga syudad ug kalungsuran sa Cebu Province subay na sa pagpatuman sa general community quarantine karong adlawa, Mayo 20.
Ubos sa Executive No. 17 nga giisyu ni Cebu Governor Gwendolyn Garcia nga gidili gihapon ang mga dili kinahanglanon nga mga lakaw bisan pa man og mas gipa-relax na ang mga protocols.
Ubos sa GCQ, gamiton gihapon sa mga residente ang quarantine pass kung adunay importanteng buhaton o paliton sa gawas.
Ipatuman gihapon ang mandatory nga pagsul-ob sa facemask ug kinahanglang magbutang ang matag institusyon og handwashing stations alang sa mga “high-touch areas.”
Subay na sa pag-abli sa mga establisimento ubos sa GCQ, kinahangang imentenar sa mga trabahante ang physical distance nga hangtud sa usa ka metro.
Magpabilin ang curfew sa takna nga alas-10 sa gabii ngadto alas-5 sa buntag alang sa mga non-essential nga indibidwal samtang dili tugutang makagawas ang mga bata nga nag-edad og 21 anyos paubos ug mga adunay balatian sa lawas.
Sirado gihapon ang mga leisure establishments sama lang sa gyms, karaoke bars, public swimming pools, sabungan, ug uban pa.
Samtang tugutan ang dine-in sa mga kan-anan apan katunga lang sa capacity ang tugtang makasulod.
Dili usab gihapon mahimong makapahigayon og bisan unsang mga mass gatherings gawas lang kung moabot lang sa 10 ka tawo paubos ang motambong.
Ablihan gihapon ang pipila lang ka mga establisimento sa sulod sa shopping malls apan kinahanglang wagtangon ang wifi ug pahinayon ang air conditioner aron dili magtambay ang mga tawo.
