CEBU CITY-Mipadangat ug rekomendasyon ang City Legal Office sa dakbayan sa Sugbo ngadto na sa buhatan sa Deparment of Interior and Local Government Unit (DILG-7) nga pasakaan ug kaso ang mga pipila ka mga barangay officials sa Barangay Cogon Central Ramos.
Gibutyag ni Cebu City Legal Officer Atty. Rey Gealon nga aduna sila’y nakuha nga mga dokumento nga nagpamatuod nga nagpagawas ug honorarium alang sa usa ka tanod nga napriso na karun sa Cebu City Jail, sila si Barangay Kapitan Omar Durano, Sr., Barangay Councilor Maria Elena Cayetano, ang chairman sa Committee on Appropriations, ug Barangay Councilor Vicente Fajardo, ang barangay treasurer.
Matud pa ni Atty. Gealon nga ang honorarium alang ni Barangay Tanod Mario Jimenez ang adunay pirma sa mga naasoy nga opisyal.
Dugang pa sa naasoy nga legal officer nga aduna pa kini “time in” ug “time out”, ingon man nga nagdawatan ug honorarium, bisan pa man nga kini anaa nagtingkagol sa Cebu City Jail sa Barangay Kalunasan.
Sa pagkakarun, gipaabot na lang sa Cebu City Legal Office ang aksyon sa DILG-7 pinaagi ni Atty. Ian Kenneth Lucero, ang Officer-In-Charge sa naasoy nga ahensya sa gobyerno.| GN
