CEBU CITY — Mukabat sa dul-an P80 million nga kantidad sa mga nasakmit nga iligal nga drogas ang gisunog sa Philippine Drug Enforcement Agency 7 sa Cosmopolitan Funeral Parlor sa dalan Junquera, dakbayan sa Sugbo, kaganihang buntag.
Gibana-bana nga mukabat sa kapin usa ka kilo nga marijuana ug kapin sa 11 ka kilo nga shabu ang gisunog.
Gibutyag ni PDEA 7 Regional Director Levi Ortiz, nga ang naasoy nga iligal nga drogas ang nasakmit sa mga sunod-sunod nga operasyon sa ilahang ahensya kauban ang Philippine National Police.
Matud pa nga lauman pa ang mga musunod nga pagsunog sa mga iligal nga drogas kung diin adunay pipila ang anaa pa sa kustodiya sa PNP.
Hinuon, gisiguro niini nga walay ‘recycling’ sa shabu nga nahitabo ug gipaabot pa nila ang court order arun nga ilaha nang masunog ang tanang mga iligal nga drogas nga ilahang nasakmit.
Ang pagsunog sa mga iligal nga drogas ang pagsunod sa PDEA ug PNP sa kamandoan ning bag-ohay lang ni Presidente Rodrigo Duterte nga gub-on ang tanang iligal nga drgas nga nasakmit sa mga gipahigayon nga anti-illegal drug operation.
Subay niini gidayeg ni Cebu City Mayor Edgardo Labella ang Cebu City Police Office (CCPO) nga gipangulohan ni PCol. Josefino Ligan ug ang PDEA- 7 gumikan sa walay hunong nga pagpanakup sa mga indibidwal nga nalambigit sa mga iligal nga drugas.
Matud pa sa Mayor nga ubay-ubay ang mga nasakmit nga gidudahang shabu apan gipasundayag usab niini nga walay biktima sa extrajudicial killing. /SBR/GN
