CEBU CITY — Dili uyon si Cebu City Mayor Edgardo Labella nga i-balik ang night market sa dakbayan sa Sugbo karong anaa pa ang hulga sa coronavirus.
Matod sa Mayor nga wala una’y mahitabo nga night market sa syudad sanglit naa pa ang pandemic diin dako ang posibilidad nga dili matuman ang mga health protocols sama sa social distancing ingon man ang pagsunod sa curfew.
Kahinumduman nga una nang gibutyag ni Cebu City Market Administrator Irven Caballes atol sa tulumanong Good Morning Philippines (GMP), nga pirma na lang sa Mayor ang kulang aron mapabalik na ang night market.
Matod ni Caballes, lakip unta sa mga angayang sundon sa mga vendors mao ang ipatuman nga social distancing sa mga mosuroy ingon man ang distansiya alang sa matag pwesto sa paninda.
Subay niini, gikan sa 400 nga mga stalls, mapaubsan na lang unta kini sa 300 ka mga pwesto. (gbs/ekp/gn)
