CEBU CITY — Kanselado ang tanang mga physical nga kalihukan alang sa umaabot nga Sinulog 2021 grand parade gumikan sa hulga sa COVID-19.
Sa giluwatang pamahayag gikan sa Sinulog Foundation Inc., nagkanayon kini nga nisanong sila sa kabalaka sa mga Sugbuanon ilabi na nga nagkasaka pagbalik ang mga kaso sa coronavirus sa dakbayan.
Lakip sa mga gipangkanselar mao ang grand ritual performance ug street dancing nga ipahigayon unta sa South Road Properties karong Enero 17.
Nakigtagbo dayon si Vice Mayor Michael Rama ngadto sa mga delegado sa matag contingents, ang production team, ug uban pa alang sa mga kalit nga kabag-uhan nunot na sa hulga nga dala sa COVID-19.
Himuon nang virtual ang paghalad og sayaw ngadto sa Balaang Bata ngadto sa ilang tagsa-tagsa ka mga lugar kung diin kuhaan og video ang matag contingent.
Matud ni Rama nga madayon gihapon ang performances gikan sa 22 ka mga contingents apan ang mga production team lang ang mokuha og video sa ilang performances ug ipasundayag sa adlaw mismo sa selebrasyon.
Nanghinaut karon ang mga organizers alang sa mas luwas ug hapsay nga pagpahigayon sa giilang “mother of all festivals” ning panahon sa new normal.
Unang nagkanayon si Mayor Edgardo Labella nga mosanong sa himoong rekomendasyon sa Inter-Agency Task Force kung dili tugutan ang maong matang sa kalihukan.
