CEBU CITY — Gipahilona karon sa storage facility sa Vicente Sotto Memorial Medical Center (VSMMC), sa dakbayan sa Sugbo ang kapin 7,000 doses sa Sinovac COVID-19 vaccine.
Kini human nga luwas nang nakaabot sa Mactan-Cebu International Airport (MCIA) ang maong mga bakuna sa takna nga alas-7:44 kaganihang buntag sakay sa usa ka Philippine Airlines flight.
Nilanat og dul-an tunga sa oras ang pagbyahe sa mga bakuna sakay sa duha ka mga refrigerated van paingon na sa gitakda niining storage area.
Matud ni Department of Health (DOH)-7 Spokesperson Dr. Mary Jean Lorreche nga unang mahatagan sa duha ka doses sa bakuna ang mga health workers sa VSMMC.
Gikalipay usab ni Lorreche ang luwas ug paspas nga paghatud sa bakuna gikan sa tugpahanan ngadto na sa mismong butanganan.
Kini bisan pa man sa pagduda sa efficacy rate niini kung diini anaa lang kini sa 60 ngadto sa 90 porsyento.
Dugang pa niini nga moabot usab sa Sugbo ang laing batches sa Sinovac vaccine karong Marso 4 aron i-allocate kini ngadto sa mga publiko ug pribadong tambalanan.
Samtang nabantayan ni VSMMC chief Dr. Gerardo Aquino nga 777 lang ka mga medical workers gikan sa 3,450 ang uyon nga mabakunahan og two-doses sa Sinovac vaccine.
Mas gamay kini itandi sa 2,900 ka mga medical workers kinsang interesadong magpabakuna kaniadto.
Sa pagkakaron, makig-alayon kini ngadto sa uban pang mga tambalanan kinsang gustong mahatagan sa maong bakuna sanglit mahinungdanon kini isip bugti sa pagpaningkamot sa mga medical frontliners.
Apan bisan pa man, andam si Dr. Aquino nga unang mahatagan sa bakuna gikan sa China.
