CEBU CITY — Gipangandaman karon sa mga organizers ug mga staff ang umaabot nga mga championship games sa Vismin Super Cup nga gipahigayon sa usa Alcantara Civic Gymnasium, Cebu.
Matud sa sports commissioner sa lungsod nga si Rey Canoy nga striktong gipatuman ang mga health and safety protocols sulod sa bubble camp sa Alcantara.
Sumala pa niini nga hapsay ang pagpahigayon sa mga duwa bisan pa man og limitado lang ang makasulod sa basketball court.
Samtang gi-disinfect ang mismong venue inig human sa matag duwa samtang gi-atiman usab sa mga staff ang panginahanglanon sa mga players.
Gikalipay usab ni Canoy ang kahigayunan sa kagamhanan nga makapahigayon sa mga duwa sa Vismin Super League sa nahisgutang lungsod.
Apan bisan pa man sa kontrobersiyang gi-atubang sa maong liga sama lang sa giingong “game fixing,” gihangop usab ni Canoy ang lakang sa mga organizers ug sa Games and Amusement Board.
Kahinumdumang suspendido sa pagduwa ang pipila ka mga pambato gikan sa Lapu-Lapu City samtang dili na makaduwa ang taga-Siquijor gumikan sa maong pasangil sa nanglabay nga mga semana.
Hinuon gitahud sa sports commissioner ang maong lakang sanglit patas nga pagduwa ang gikinahanglan.
