CEBU – Napanglantawan ni Cebu City Mayor Michael Rama nga posibling mas sadya ug mas engrande ang Sinulog Festival sa tuig 2023.
Gibutyag ni Rama nga gumikan sa iyahang kadaugan isip mayor sa dakbayan, ingon man sa hinayhinay nga pagbuhi sa turismo gikan sa pandemya, posibli nga ipahigayon ang Sinulog sa South Road Properties (SRP).
Matud pa, sa iyahang nakita sa grand campaign rally sa UniTeam kay giingong maka-accomodate gayud ang lugar ug hilabihan ka baga sa tawo nga walay pagpunsisok susama sa mga indoor nga lugar, sama sa Cebu City Sports Center nga mao’y sagad pahigayonan sa mga aktibidad sa Sinulog.
Posibli nga dili pa mahuman ang COVID-19 pandemic sa tuig 2023, apan masaligon ang mayor nga mamahimong lingaw nga layo sa pagtinakdanay sa kagaw ang ipahigayon nga Sinulog sa SRP.
