CEBU CITY-Nagpahigayon ug imbestigasyon ang Cebu City Police Office (CCPO) arun nga ma-ilhan ang tawo nga nanawag ug mga empleyado sa City Hall arun nga mangayo ug delivery, ingon man 80 ka sakong bugas alang sa mga police personnel gamit ang ngalan ni CCPO Director, Police Colonel Ireneo Dalogdog.
Sa pakighinabi sa Bombo Radyo Cebu kang Colonel Dalogdog, gipahibalo niini nga ang maong impostor ang nanawag sa Treasurer’s Office ug nangayo ug usa ka sakong bugas kay aduna sila’y programa.
Matud pa, maayo na lang kay mitawag kaniya ang empleyado hinungdan nga dali niini nga gihimakak ang maong tawag.
Sigon pa ni Dalogdog nga dili iyahang kinaiya ang mupahimulos ilabi na nga gamit ang iyahang ngalan arun lang nga mangayo ug kwarta o bisan unsa mang pabor.
Giangkon sa police official nga lisod ilhon ang sad-an tungod kay mahimong ilabay ang sim card human nga magamit sanglit wala pa man hingpit nga mi-epekto ang balaud sa sim registration gumikan sa gipatuman nga extension.
Subay niini, mipahimangno si Dalogdog sa publiko nga dili mutuo sa bisan kinsa man nga mutawag, diin gamit ang iyahang ngalan nga nangayo ug pabor.
Kahinumdoman nga kaniadto nabiktima usab ang usa ka catering company human nga mi-order ug pagkaon ang nagpaila nga si Mayor Michael Rama, nanghuwam ug P10,000 ug misaad nga bayran kini inig ma-deliver na ang pagkaon.
