MINGLANILLA, CEBU-Gilusad sa Minglanilla Rural Health Unit (RHU) ang kampanya batok sa dengue kauban ang Municipal Environment and Natural Resources Office (MENRO) niadtong adlaw nga Biyernes, Hunyo 23, 2023.
Unang gi-ablihan ang maong kampanya sa Barangay Tungkil ug Barangay Linao, ingon man ang kabukiran sa Campo 7 ug Campo 8.
Sa maong aktibidad nga gipangulohan ni Dr. Mae Vicente, gisubay sa mga opisyal sa gobyerno ang posibli nga gipuy-an sa mga lamok nga nagdala ug dengue, ilabi na sa mga pangpubliko nga lugar sama na lang sa barangay hall, kapilya ug mga eskwelahan.
Ang anti-dengue campaign kay maglakip usab sa sunod-sunod nga mga kalihokan sama sa cleanup drive, poster-making ug audio-visual presentation contests, nga salmotan sa 19 ka mga barangay sa lungsod.
Nagtinguha ang maong ‘contest’ sa pagpalambo sa creativity sa mga residente samtang nag-awhag sa paglakip sa paghimo sa usa ka palibot nga walay dengue.
Ang maong kampanya kay usa ka hini-usa nga paningkamot tali sa Provincial Health Office, Department of Health, ug lokal nga kagamhanan sa Minglanilla.
