MANDAUE CITY, CEBU- Itukod ang usa ka P60 milyones nga balor sa multi-purpose building nga police station sa Barangay Subangdaku, Mandaue City.
Ang proyekto nahimong posible pinaagi sa inisyatiba ni Mandaue City Lone District Representative Emmarie “Lolypop” Ouano-Dizon.
Kung diin ang ground breaking ceremony gipahigayun kagahapon, ug kung mahuman na kini maoy labing unang matang sa police station sa Sugbo, kon dili sa tibuok Kabisay-an.
Sa iyang mensahe atol sa kalihokan, si Ouano-Dizon niingon nga gibati niya ang tumang kalipay sa PNP Mandaue ug usa kini ka dakong dungog alang sa iyang district office, sa Mandaue City government ug sa Philippine National Police.
Nagpasalamat usab siya sa kagamhanan sa dakbayan pinangulohan ni Mayor Jonas Cortes sa kanunay nga pagsuporta sa iyang mga programa ug proyekto.
Iyang gipasabot nga kini maoy resulta sa ilang padayon nga alyansa ug panag-uban.
Nagpasalamat si Police Regional Office-7 deputy regional director, Police Col. Noel Flores, kang Ouano-Dizon ug Cortes sa ilang walay puas nga suporta ug pagsalig sa organisasyon sa kapulisan, ug mipasalig nga motabang sa mga panginahanglanon sa katawhan.
Gidayeg usab ni Ouano-Dizon ang pasalig sa DPWH sa pagpatuman sa nasangpit nga imprastraktura tungod kay ang ground breaking dili lang usa ka seremonyas kondili usa ka buhat sa malungtarong kabilin.
Ang ground breaking ceremony gitambongan usab nila ni Mandaue City Councilors Cesar Cabahug, Andjong Ouano Icalina, Nerissa Soon-Ruiz, Atty. Joel Seno, Malcolm Sanchez, Cynthia Cinco Remedio, Maline Zafra, Oscar del Castillo, Jimmy Lumapas, ABC president Ernie Manatad, Subangdaku barangay councilors, Mandaue City Police Office chief, Col. Jeffrey Caballes, ug Engr. Edgardo Talagsa sa DPWH-7.
