Mitapos na sa ilang imbestigasyon ang kapolisan sa Labangon sa pagpatay sa 19-anyos nga si Rhea Mae Tocmo, kansang lawas napalgan nga gisulod sa kahon sayo sa buntag niadtong Hulyo 17, 2023.
Gibutyag ni Police Major Angelito Valleser, hepe sa Labangon Police Station, nga ang kaso gikonsiderar na nga ‘solved and closed’ human gipasaka ang kasong murder sa Cebu City Prosecutor’s Office gahapon Biyernes Agosto 18, batok kang Simeon Gabutero Jr. kinsa niangkon nga iyang gipatay si Tocmo, ug sa iyang 15-anyos nga igsuon, kinsa mitabang kaniya sa paglabay sa lawas.
Ang amahan ni Tocmo nga si Romeo, maoy mireklamo sa kasong murder.
Gidugang ni Valleser nga ang igsuon ni Gabutero naapil sa kaso tungod kay dili sila ang magbuot sa iyang innocence o guilt.
Ang menor de edad nihimo og extrajudicial confession diin iyang giangkon nga iyang gitabangan si Gabutero paglabay sa karton nga gisudlan sa lawas ni Tocmo.
Apan matud pa sa bata nga wala siya masayud kung unsay sa sulod sa maong karton.
Sa kasamtanagan nagpabilin ang menor edad sa kustodiya sa iyang mga ginikanan.
Matod ni Valleser nga ilang dakpon ang menor de edad human sa warrant of arrest nga giluwatan sa korte.
Sa laing bahin, ang ilang inahan nipatuman usab og extra-judicial confession.
Dugang sa opisyal nga aduna silay “air-tight” nga kaso batok kang Gabutero nga resulta sa ilang usa ka buwan nga imbestigasyon.
Human mapasaka ang kaso, maghuwat na lang sila sa schedule sa preliminary investigation.
