CENTRAL VISAYAS-Giklaro ni Department of Education (DepEd 7) Director Salustiano Jimenez nga wala gi-require ang uniform sa mga magtutungha sa mga pampublikong tunghaan karon nga school year 2023-2024.
Matud ni Jimenez, nga tumong niini nga malikayan ang dugang gastuhan sa mga ginikanan.
Sa pikas bahin, nakatala na ang DepEd Central Visayas og dul-an 1.5 million ka mga estudyante nga na-enroll sa pampublikong tunghaaan sa elementary ug high schools.
Anaa usab sa 186,000 ka mga estudayante ang enrolled sa private schools ug dul-an 2,000 ka mga magtutungha sa State Universities and Colleges ug 6,500 enrollees sa Alternative Learning System (ALS).
Gilauman nga mosaka pa ang maong ihap ilabi na nga nagpadayon pa ang enrollment samtang nagpadayon pa usab ang ubang mga tunghaan sa pag-encode sa ilang Learner’s Information System (LIS).
Andam na ang DepEd 7 lakip na ang mga tunghaan sa Central Visayas alang sa unang adlaw sa klase karong Agosto 29 sa school year 2023-2024.
