LAPU-LAPU CITY-Nipagawas na og computerized cartographic sketch ang Regional Forensic Unit sa Central Visayas (RFU-7) sa suspek sa ‘attempted human trafficking’ sa Barangay Bankal, dakbayan sa Lapu-Lapu niadtong Hulyo.
Sa sayo pa, ang Lapu-Lapu City Police Office (LCPO) nangayo og tabang sa RFU-7 sa paghimo sa facial composite sa suspek base sa CCTV footage nga ilang nakuha sa maong establisemento, diin ang suspek nakigtagbo sa upat ka menor de edad nga biktima.
Giawhag karon sa LCPO ang mga nakaila sa tawo nga naa sa cartographic sketch, nga mohatag og impormasyon bahin sa iyang nahimutangan.
Sa laing bahin, gitambagan usab sa LCPO ang mga tag-iya sa apartment nga kuhaon ang mga kredensyal sa ilang mga nag-abang.
Ang suspek sa napakyas nga pagdagit nag-abang sa usa ka apartment sa Barangay Bankal diin iyang gidala ang mga biktima human sila nagkita sa usa ka establisemento sa Barangay Pajac.
Matud pa ni Police Lieutenant Colonel Christian Torres, hepe sa City Investigation Detection and Management Unit (CIDMU) sa LCPO, nga pinaagi niini mailhan dayon nila ang mga nag-abang nga posibleng malambigit sa kriminalidad.
Dugang pa, nga kini nga pamaagi makapugong usab sa mga tag-iya sa apartment nga malambigit sa mga kriminal nga kalihokan sa ilang mga nag-abang.
Matod niya nga konsultahon sab niya ang konseho sa dakbayan kon nakapasar ba sila og ordinansa nga nagmando sa mga tag-iya og apartment sa pagkuha sa impormasyon o kredensyal sa ilang mga nag-abang.
