LILOAN, CEBU-Patay ang usa ka 18 anyos nga security guard human niini maluwas ang duha ka menor de edad nga nalumos sa baybayon sa Barangay Catarman, lungsod sa Liloan.
Giila ang biktima nga si Judel Escorel, usa ka working student nga lumulopyo sa Barangay Poog, dakbayan sa Toledo.
Base sa report, usa ka pamilya gikan sa Consolacion ang naglingaw-lingaw uban sa ilang duha ka mga anak ug dihang nakita ni Escorel nga nalumos ang duha dali kining miresponde ug misuway sa pagluwas niini.
Sa pakighinabi sa Bombo Radyo Cebu News Team kang Police Major Eric Gingoyon, ang hepe sa Liloan Police Station nga nakit-an sa guwardiya ang mga bata nga nagkinahanglan og tabang gani, wala nagduhaduha si Escorel nga motabang hilabi na nga usa kini sa iyang ekspertise ang paglangoy.
Gani, malampuson nga naluwas ang duha ka bata apan, tungod sa kusog ang hangin ug balud wala naluwas ni Escorel ang iyang kaugalingon ug naanod.
