CEBU CITY-Dili dako og epekto sa kinatibuk-ang water supply sa Metropolitan Cebu Water District (MCWD) ang pagkunhod sa water level sa Buhisan dam.
Gipasabot ni Minerva Gerodias, ang tigpamaba sa MCWD, nga anaa lang sa 6,000 cubic meter matag adlaw ang ilahang makuha nga supply gikan sa Buhisan dam, diin gamay lang kini sa kinatibuk-ang 300,000 cubic meter nga total supply.
Matud pa, dili angayan nga tutokan ang Buhisan dam gumikan kay aduna may daghan nga water sources ang MCWD.
Hinuon, giangkon ni Gerodias nga gumikan sa El Niño phenomenon, apektado na usab ang uban pang surface water sources hinungdan nga masinati na sa mga kunsomidor ang hinay nga supply tubig.
Gipahibalo usab niini nga ang Jaclupan dam kay maka-supply na lang og 15,000 cubic meter matag adlaw gikan sa 30,000 cubic meter.
Kung itandi sa Buhisan dam, giingong mas dako pa nga water source ang Jaclupan.
Subay niini, nangayo na lang og despensa ug pagsabot si Gerodias sa mga kunsomidor sa MCWD gumikan kay mihinay gayud ang pag-distribute nila og tubig gumikan sa pagkunhod sa water supply sa ilahang mga water sources.
