CEBU CITY-Nipadayag og kasagmuyo sa pagsalikway sa mosyon nga ibalik ang Citizen’s Hour sa sesyon sa konseho sa dakbayan sa Sugbo si Cebu City Councilor Nestor Archival atol sa reorganizational session niadtong Hulyo 3.
Namahayag si Archival nga ang maong mosyon gitumong sa paghatag ug plataporma sa mga lungsuranon sa pagpahayag sa ilang mga kabalaka ug mga sugyot direkta ngadto sa ilang mga napili nga representante.
Gipasiugda ni Archival ang pagkadiskonekta tali sa mga desisyon sa konseho ug sentimento sa publiko.
Kini atol sa paglutaw sa mga lakang sa konseho sama nalang sa 500-milyones pesos nga inisyal nga budget para sa Palaro nga dakong laslas sa kinatibuk-ang pundo sa dakbayan.
Gitataw sab sa konsehal nga kon walay higayon sama sa citizen’s hour, ang mga kritikal nga pangutana sa publiko bahin sa mga galastohan, kay dili matubag.
Apan sa pakighinabi sa Bombo Newsteam kang Majority Floor Leader Cebu City Councilor Jocelyn “Joy” Pesquera nga ang maong mosyon nga gibuhat ni Archival kay wala natukma sa proseso sa konseho kay kini usa ka amendment sa ilahang House Rules nga una nang nahipos sa wala pa miisa sa konsehal nga lider sa minorya.
Dugang pa sa konsehala nga ang mga miyembro sa Sangguniang nga gipili sa katawhaw na ang representante nila sa unsa man ang gusto nilang ipadayag sa pagpanday ug mga balaudnon sa dakbayan ug ang Citizen’s Hour kay makahatag lang ug kagubot sa mga hisgutanan.
