CENTRAL VISAYAS-Hingpit na ang pagpangandam sa Police Regional Office 7 alang sa paghatag ug pagsiguro sa hugot nga seguridad sa pag-abli sa klase sa mga pribado ug pampublikong tunghaan sa Central Visayas.
Gipaambit ni Police Lieutenant Colonel Gerard Ace Pelare ang tigpamaba ni Police Brigadier General Anthony Aberin, ang hepe sa kapulisan sa Central Visayas nga sa ilang gihimo nga inventory sa mga tunghaan sa rehiyon kay ilang nasayran nga mokabat sa 3,854 ka mga tunghaan ang ilang hatagan sa siguridad diin 600 niini pribadong eskwelahan.
Gipasalig ni Pelare nga ang tanang tunghaan kay sigurado nga mabutangan og Police Assistance Desk o kon PADS aron mao’y maduolan sa mga ginikanan ug mga estudyante kung makahimamat sila og mga problema.
Gimando usab ni Aberin ang tanang station commanders nga motuyok o roving gawas sa mga dagkong eskwelahan lakip na ang pag-adjust sa ilang beat patrol ug kinahanglan nga adunay mag-foot patrol nga mga police arun sa pagsiguro sa kaluwasan sa mga tinun-an.
Ingon man nga lakip sa mando sa PRO-7 director sa mga hepe sa kapulisan nga sa dili pa ang pormal nga pagsugod ang klase kay labing maayo nga makigtagbo na kini sa Parents Teachers Association aron masayod ang police kung unsay problema.
