CEBU CITY- Nasakmit sa mga sakop sa PDEA-7 ang lima ka kilo sa gituohang shabu nga gibana-banang nag balor ug P34-milyones sa usa ka babaye sa Brgy. Carreta,Cebu City.
Nahitabo kini atol sa buy-bust operation sa mga sakop sa Philippine Drug Enforcement Agency – Central Visayas (PDEA-7) sa dalan Cokaliong, Barangay Carreta ning dakbayan sa Sugbo pasado alas 4:50 sa hapon gahapon Biyernes, Oktubre 11, 2024.
Giila ang dinakpan nga si Maria Christine Abarquez alias “Tinang”, 51-anyos, ug lumulupyo sa sa Barangay Cogon Pardo sa samang dakbayan.
Uban sa maong operasyon ang mga personahe sa Regional Special Enforcement Team-Mandaue City Office (RSET-MCO), Intelligence Section-Intelligence Operation Unit (IS-IOU), Naval Forces Central, PRO-7 Regional Police Drug Enforcement Unit.
Personal nga gisaksihan ni Cebu City Mayor Raymond Alvin Garcia ang maong operasyon sa mga awtoridad nga matod pa niya “good job” para sa halapad nga pakigkumati sa gobyerno batok sa illegal nga droga.
Mag-atubang ang dinakpan og kaso nga kalapasan sa Section 5 ug 11 sa Article II Republic Act 9165 o Comprehensive Dangerous Drugs Act of 2002.
