Gibutyag ni kanhi Philippine Charity Sweepstakes Office (PCSO) General Manager Royina Garma ang usa ka indibidwal nga suod ni Senador Bong Go kalabot sa financial operations sa kontrobersyal nga duguong gubat batok sa drugas sa Duterte administration.
Sa testimonya ni Garma sa House Quad Committee niadtong Biyernes, iyang giila ang usa ka alyas nga “Muking” nga nagpaila kaniya nga si Espino kinsa kawani ni Go sa iyang opisina sa Davao City Hall niadtong mayor pa si Duterte ug nagpadayon sa pagtrabaho uban ni Go hangtod nga nahimong Special Assistant ngadto sa Presidente sa Malacañang nga nagsilbi isip Assistant Secretary sa iyang opisina.
Gibutyag ni Garma ngadto sa komitiba ang giingong reward system sa EJKs.
Sa affidavit ni Garma, iyang gitumbok silang ex-PRRD ug Go nga maoy nagtukod sa nationwide war on drugs campaign nga niresulta sa daghang kaso sa EJK.
Matod ni Garma nga niadtong 2016 mikontak kaniya si Espino aron makuha ang contact information ni kanhi Criminal Investigation and Detection Group (CIDG) Region 11 Chief Col. Edilberto Leonardo base sa hangyo ni ex-PRRD.
Girekomenda ni Garma si Leonardo nga mangulo sa nasudnong anti-drug task force nga nagsundog sa Davao Model.
Gidetalye ni Garma ang relasyon ni Espino kang Peter Parungo, kinsa usa ka non-PNP personnel nga nakadumala og dakong kantidad sa kuwarta nga gipadala sa nagkalain-laing bank account atol sa kataas sa operasyon sa drug war.
Matod ni Garma, nipadayag og kabalaka si Parungo tungod sa kadaghan sa kuwarta nga nisulod sa iyang account.
Gitino nga ang Metrobank, BDO, ug PS Bank account ni Parungo mao ang nag-unang agianan sa mga transaksyon.
Gipaabot usab nga ibutyag sa mga magbabalaod ang tahas ni Espino.
Ang sunod nga pagdungog gipaabot nga matino ang pinansyal nga aspeto sa kampanya batok sa droga.
Matud ni Barbers nga hinungdanon nga mahibal-an ang money trail.
