CEBU- Mag-abli og bag-o nga mga flights ug airline carriers ang Mactan-Cebu International Airport (MCIA) sa dakbayan sa Lapu-Lapu, Isla sa Mactan karong hinapos sa buwan sa Oktubre 2024.
Kini nga impormasyon kay gitunol ni Aboitiz InfraCapital GMR Megawide Cebu Airport Corporation CEO Athanasios Titonis ngadto kang Cebu Provincial Governor Gwendolyn Garcia nga maong importanteng kalamboan atol sa panagtigom niini sa Cebu Capitol Social Hall kagahapong adlawa sa Lunes, Oktubre 21.
Uban sa maong panagtigom si Rafael Aboitiz, ang pangu sa Airport Business Operations sa Aboitiz InfraCapital.
Lakip sa mga bag-ong rota nga ilusad sa umaabot Oktubre 24 mao ang paingon sa San Vicente Airport sa Palawan; Masbate Airport sa islang probinsya sa Masbate; Bangkok International Airport sa Bangkok, Thailand; ug Kansai International Airport sa Japan.
Dugang niini nga ang United Airlines (usa ka American-National Airline Company) sa dili madugay mo-operate og Cebu–Narita flight sa Japan.
Samtang ang Aero-K (usa ka South Korean-National Airline Company) moserbisyo sa Cebu–Cheongju route sa South Korea.
Kini nga mga bag-ong tanyag nga mga rota gilauman nga magdala sa pagdagsa sa mga byahero pinaagi sa MCIA og naglantaw sa kapin 12-milyones ka mga pasahero ang matala sa dayong pagtapos sa tuig 2024.
Gawas niini, ang MCIA nagplano usab sa pagpalapad sa ilang terminal, airside facilities, commercial facilities ug pagbalhin sa imprastraktura aron suportahan kini nga mga paningkamot nga pagapundohan sa inisyal nga balor sa P800-milyones alang sa capital projects.
