Giaprobahan sa Commission on Elections (COMELEC) ang 15 porsiyento nga shading threshold sa balota sa May 2025 National and Local Elections (NLE), ang kinaubsan sukad sa 2010 nga piniliay.
Mipahayag si Comelec Chairmain George Erwin Garcia sa usa ka press release niadtong Sabado, Nobyembre 1 nga ang pagpaubos sa shading threshold sa oval gikan sa 25 porsiyento girekomendar sa Project Management Office (PMO).
Matod ni Garcia nga ang rekomendasyon giaprobahan sa Comele en banc.
Niawhag si Garcia sa mga kandidato nga tabangan ang Comelec sa pag-edukar sa mga botante unsaon pagtuman sa balota sa higayon nga magsugod na ang campaign period.
Sa 2022 ug 2019 polls, ang threshold nga gisagop anaa sa 25 porsyento samtang sa 2016 ug 2013, kini anaa sa 50 porsyento.
Ang threshold nga gigamit sa 2010 nga eleksyon, ang unang electoral exercise sa nasud nga migamit sa automated election system, maoy 20 porsyento.
Magsugod ang campaign period alang sa mga nasudnong kandidato (senador ug party-list group) sa Pebrero 11, 2025 ug alang sa mga lokal nga katungdanan (mga membro sa House of Representatives, BARMM parliamentary, provincial, city, ug municipal officials), Marso 28, 2025.
Molungtad ang campaign period hangtod sa Mayo 10, 2025.
