CEBU CITY- Naglusad og imbestigasyon ang Philippine National Police – Internal Affairs Service (PNP-IAS) batok sa mga opisyal sa Cebu City Police Office (CCPO) mahitungod sa misconduct ug excessive force sa mga kawani niini sa kontrobersyal nga pag-aresto kang kanhi Cebu City Administrator Atty. Collin Rosell sa Cebu City Hall niadtong Nob. 8, 2024.
Sa usa ka suwat, nakalatid nga ang PNP-IAS kay gi-refer ang maong reklamo batok kang CCPO City Director PCol. Antonietto Cañete ug mga kaubanan ngadto sa Regional Internal Affairs Service – Central Visayas (RIAS-7) para sa mas dugang nga pag-imbestigar.
Kung diin, imbistigahon sa RIAS-7 kung nakalapas ba ang mga opisyal sa protocol sa pulisya ug nakahimog gross misconduct o neglect of duty.
Ang reklamo nagsumikad sa usa ka insidente niadtong Nobiyembre 8, nga giingong gisulong ni PCol. Cañete ug pipila ka mga opisyal ang City Hall ug pugsanong gitangtang si Rosell sa iyang buhatan nga wala maghatag ug balidong basehan sa pagdakop kaniya.
Agig tubag ni Atty. Luis A. Vera Cruz, ang legal counsel ni Rosell, ang PNP-IAS nangayo og certified copies sa sworn affidavit ni Rosell ug bisan unsa nga dugang nga ebidensya aron makatabang sa imbestigasyon.
Gipaniguro sa PNP-IAS nga hingpit nilang pagatukion ang maong butang uban sa koordinasyon sa mga imbestigador sa RIAS-7 nga pinangulohan ni PLt Col Napoleon D. Cruz.
Ang imbestigasyon sa PNP-IAS miabut taliwala sa usa ka mas lapad nga serye sa mga ligal nga away nga naglambigit ni Rosell.
Sa mga nakalabayng semana, daghang mga reklamo ang gipasaka ni Rosell, lakip na ang kasong child abuse, batok kang PCol. Cañete, PMaj. John Lymbert Castigador Yango sa Waterfront Police Station 3, Cebu City Mayor Raymond Alvin Garcia, ug ubang mga opisyal sa kagamhanang dakbayan sa Sugbo.
