Giingong dili na kinahanglang imbitahon si kanhi Presidente Rodrigo Duterte sa sunod nga hearing sa House Quad Committee karong Disyembre 12 kalabot sa imbestigasyon sa giingong extra judicial killings sa kampanya batok sa ilegal nga drugas sa miaging administrasyon.
Kini maoy gipahibalo ni House quad-committee overall chairman Surigao del Norte 2nd district Rep. Robert Ace Barbers.
Matod niya, nakuha na sa mega-panel ang igong impormasyon sa ilang kinahanglan, kini nagpasabot nga ang pagtambong ni kanhi Presidente Duterte sa committee hearing niadtong Nobyembre 13 maoy una ug kataposan niyang pagtambong.
Gipasabot pa sa magbabalaod nga sulod sa 13 ka oras nga pagdungog, ilang nadungog ang gusto nilang madungog diin ang uban matud pa niya nag-una sa gibutyag o giangkon sa kanhi Presidente atol sa Senate hearing.
Kahinumduman nga ang kanhi presidente maoy unang nitambong sa hearing sa Senate Blue Ribbon Committee niadtong Oktubre 28 diin mihatag og taas nga testimonya ang kanhi lider sa nasud.
Samtang, matud pa ni Cong. Barbers nga ang House Quad Comm magpadayon sa pagpahigayon og mga hearing hangtod sa sunod tuig kalabot sa mga kaso sa EJK ubos sa Duterte drug war.
