MANDAUE CITY-Gihimakak ni Mandaue City Mayor Glenn Bercede nga aduna kiniy giluwat nga gag order sa mga nagkalain-laing departamento sa kagamhanang dakbayan.
Kini human mapakyas sa pagkuha og habig ang mga sakop sa media sa mga pipila ka mga kadagkuan niini sa higayong bisitahon sa ilang mga opisina.
Matod ni Mayor Bercede nga wala siya midili sa mga department heads nga manubag kabahin sa mga nagkadaiyang mga isyu sa ilang mga buhatan.
Dugang pa sa opisyal nga posibling ang kahadlok masayop ang mga department heads ilabi na sa nagkataas nga panagbangi sa politika sa mga lideres niini nga mapasakahan og kaso sama sa nahitabo ni Dismissed Mayor Jonas Cortes.
Gipadayag sab ni Mayor Bercede nga nakasabot siya sa sitwasyon sa mga department heads nga anaa sa kahadlok ilabi na gihugon-hugon nga siya na usab ang sunod nga isuspenso tungod sa pagsang-at og huyang kaso sa usa ka ordinaryong molopyo nga dili niya kaila.
Gipasalig hinuon sa Public Information Officer sa Mandaue City nga si Karla Victoria Cortes nga andam motubag ang ilang buhatan sa mga pangutana sa mga sakop sa media ug mahimo usab nga iyang adtuon ang department heads arun motubag sa mga pangutana sa media.
