Walay nakitang isyu ang Department of Justice (DOJ) sa paghatag og clemency kang Mary Jane Veloso.
Giklaro niini nga ang maong desisyon nagdepende kang Presidente Ferdinand Marcos Jr.
Matud pa sab ni Justice USec. Raul Vasquez nga ang DOJ maoy usa sa mga makarekomendar kang Presidente Marcos alang sa sunod nga lakang sa kaso ni Veloso.
Dihang gipangutana sa opisyal sa DOJ kung girekomenda ba kini sa ahensya sa Presidente, si USec Vasquez miingon nga tukion kini pag-ayo ug sama sa giingon ni Presidente Marcos nga naa na kini sa lamesa aron hisgutan sa ubang mga persons deprived of liberty (PDLs) nga gikatakdang hatagan og clemency.
Samtang nagtuo ang opisyal sa DOJ nga dili kini makahatag og negatibong mensahe sa Indonesia tungod kay sila mismo ang nagbutang kang Veloso aron ibalik sa nasod, ug karon nga naa na siya sa PH isip PDL, ubos na usab siya sa tanang katungod ug prebilihiyo base sa balaod sa Pilipinas.
Giklaro sa opisyal nga walay special treatment kang Veloso samtang gitanggong kini sa Correctional Institution for Women aron makapadayon sa pagserbisyo sa iyang sentensiya. Bisan pa man nga gipasalig sa opisyal sa DOJ nga ang Bureau of Corrections (BuCor) gitahasan aron masiguro ang kaluwasan ug kaayohan ni Veloso.
Kahinumduman nga si Veloso mao ang Pinay nga gisentensiyahan og kamatayon sa Indonesia tungod sa ilegal nga drugas, ug nibalik sa Pilipinas kaniadtong Miyerkules human sa kapin 14 ka tuig nga pagkabilanggo sa Indonesia.
