Patay ang upat ka mga tawo sa habagatang kasadpan sa Turkey sa dihang ang usa ka ambulansya nga helicopter kay nabangga sa usa ka building sa ospital ug nahagsa sa yuta.
Nasayran nga ang helicopter gikan sa Mugla Training and Research Hospital, nga nagdala sa duha ka piloto, usa ka doktor ug laing medical worker.
Matud pa nga una nga naigo ang helicopter sa ikaupat nga andana sa building sa ospital sa wala pa nahulog sa yuta.
Gawas sa natala nga casualties kay wala nay gikataho nga naangol sa aksidente nga anaa sa maong building sa higayon nga nabangga ang helicopter.
Makita sa footage ang mga tinumpag gikan sa pagkahagsa nga nagkatag sa palibot sa lugar sa gawas sa edipisyo sa tambalanan, nga adunay daghang mga ambulansya ug mga emergency team ang mirespondi.
