CEBU CITY- Nagpahigayon og Coordination Meeting ang Kapulisan sa Sugbo nga gipangulohan ni Cebu City Police Office City Director, Police Col. Antonietto Cañete alang sa security coverage sa umaabot nga Iglesia Ni Cristo (INC) Nationwide Peace Rally nga gikatakda karung umaabot nga Lunes Enero 13, 2025.
Ang miting gitambongan ni PLTCOL MA. THERESA MACATANGAY, Deputy City Director for Operations (DCDO), CCPO Quad Staff, Force Commander sa City Mobile Force Company (CMFC), Hepe sa Traffic Enforcement Unit (TEU), ang Station Commander sa Police Station 11, Mr. Jimmy Fortes , Cebu City Transportation Office (CCTO) Operations Officer, ug mga lider sa INC nga gipangulohan ni Mr. Jomar B. Dueñas, Cebu District Head.
Ang agenda nagtutok sa security plan, crowd control measures, ug traffic management alang sa kalihukan, nga ipahigayon sa South Road Properties (SRP), Cebu City.
Kung diin, gitumong kini sa pagtukod og komprehensibo nga mga lakang sa seguridad aron masiguro ang hapsay ug luwas nga pagpahigayon sa rally, nga gilauman nga tambongan sa kapin o kulang 30,000 hangtod 40,000 nga mga partisipante.
Ang miting natapos sa mga alas 9:30 sa gabii, nga miresulta sa mabungahon nga mga diskusyon ug aksyon nga mga plano alang sa kahikayan sa seguridad ug trapiko sa kalihokan.
Una na nga nipagawas og pahibalo ang Presidential Communications Office (PCO) nga suspendido ang klase sa mga buhatan sa gobyerno ug tanang level sa pribado ug pampublikong tunghaan sa mga dakbayan sa Manila ug Pasay sa sama nga adlaw subay sa Memorandum Circular No. 76., apan wala nalatid ang ubang mga lugar gawas sa nahisgutan sa unahan.
