Gikompirmar sa Philippine Coast Guard (PCG) nga sa unang higayon, nigamit ang China og Long Range Acoustic Device o LRAD sa pagpanghasi sa usa ka barko sa Pilipinas sa West Philippine Sea.
Matod sa PCG, kanunay nga naggamit ang China og water cannons ug delikadong maniobra aron hadlokon ang mga barko sa Pilipinas.
Sa usa ka pamahayag, ang tigpamaba sa PCG sa West Philippine Sea Commodore Jay Tarriela miingon nga ang China migamit og Long Range Acoustic Device (LRAD), usa ka specialized loudspeaker nga makapagawas og high-intensity sound nga makapahinabog kadaot sa eardrums ingon man permanente nga pagkawala sa pandungog.
Partikular nga giila ni Tarriela ang barko sa China Coast Guard nga adunay hull number 3103 nga migamit sa LRAD sa pag-harass sa BRP Cabra (MRRV-4409) aron mapugngan ang pagduol niini.
Dugang ni Tarriela nga ang CCG-3103 maoy mipuli sa CCG-3304 aron iligal nga magpatrolya sa bahin sa exclusive economic zone sa Pilipinas.
Bisan pa sa pagpanghasi sa China Coast Guard, wala matarog ang BRP Cabra sa PCG inay nagpadayon kini sa paghimo og mga lakang aron mapugngan ang pagsulod sa baybayon sa Zambales.
Subay niini, nnagpadayon usab ang PCG sa pag-isyu og mga radio challenge ngadto sa CCG, nga nag-ingon nga ang ilang presensya nakalapas sa Philippine Maritime Zones Act, ug sa United Nations Convention on the Law of the Sea (UNCLOS).
