BRAZIL-Patay ang 14-anyos nga taga Brazil human misuway sa usa ka delikadong viral challenge.
Giila kini nga si Davi Nunes Moreira nga taga Vitoria da Conquista, Brazil.
Matud sa taho nga gisagol ni Davi ang patay nga alibangbang o butterfly sa tubig ug og gi-turok kini sa iyang lawas isip tubag sa social media challenge nga miresulta sa iyang kamatayon tungod sa grabeng komplikasyon sa panglawas.
Usa ka espesyalista sa ospital ang nag-ingon nga posibleng nakaangkon og embolism, impeksyon, o allergic reaction ang batan-on.
Diin ang embolism mao ang usa ka ‘blockage’ sa agianan sa dugo nga mahimong magresulta sa kalit nga pagkamatay sa biktima.
Gibutyag usab sa mga eksperto nga posibleng may hilo ang alibangbang nga nagresulta sa septic shock, usa ka kondisyon nga mahitabo kung mokatag ang impeksyon sa tibuok lawas.
Samtang gihuwat pa sa mga awtoridad ang resulta sa post-mortem aron matumbok ang ensaktong hinungdan sa iyang pagkamatay sa bata.
