CEBU CITY- Gisilbihan og ‘search warrant ‘ ang usa ka Pro DU30 Blogger nga si Ernest “Jun” Abines ganihang alas 12 sa tungang gabii sa iyahang balay nga nahimutang tapad sa Maharlika Gym, Brgy. Sambag 2, Cebu City.
Giingong gisulod sa mga pulis ang ilahang panimalay nga anaa sa 12 kabuok nga gikan pa sa Manila Police og gipadala ni CIDG chief Police Brigadier General Nicolas Torre III, aron magsilbi sa Search Warrant kalabot sa cyber libel case nga gipasaka batok kanila.
Subay sa usa ka audio record ni Jun Abines pinaagi sa mobile number sa iyang partner, gibutyag ni Abines nga milungtad og upat (4) ka Oras ang pagpangita sa iyang PC ug Cellphone diin nagduda kini nga gi-hack sa Pulis ang iyang Social Media ug Email.
Gikompirmar usab niya, pinaagi sa iyang facebook post ang pagsulod sa mga pulis ug gikompiskar usab ang iyang celphone.
Hangtod ning mga orasa dili pa makontak si Abines.
Nasuta nga si Jun Abines ang Lead Convenor sa Hakbang ng mga Maisug sa Cebu maoy usa sa mga nangulo kalabot sa pagahimoon nga halapad nga Cebu People’s Indignation Rally karong alas 4 sa hapon sa Mandaue City, Pebrero 22, 2025.
Una niini, ang hepe sa Criminal Investigation and Detection Group (CIDG) nga si Brig.Gen. Nicolas Torre III mipasaka og mga reklamo sa cyber libel batok sa kanhi magsisibya nga si Jay Sonza ug laing vlogger tungod sa pagpakatap og “fake news” bahin kaniya.
Si Torre niingon nga tuyo niya nga mangayo og tulubagon sa mga tsismis ug mga litrato nga nikatap online nga nag-ingon nga naospital siya.
Apil niini si Jun Abines, diin gipakita usab sa iyahang mga post ang usa ka giingong litrato ni Torre nga naghigda sa higdaanan sa ospital.
