Padayon nga nagmonitor ang Department of Information and Communications Technology sa bag-ong pamaagi sa pagpakatap sa sayop nga impormasyon samtang nagkaduol ang eleksyon.
Nadiskobrehan sa departamento nga ang Advance Persistent Threat Groups naggamit og taktika nga gitawag og ‘Amplifiers’.
Sama sa gipaambit mismo ni Undersecretary Jeffrey Dy sa Department of Information and Communications Technology, imbes nga hacking, ang gitutokan karon sa mga hacker kay daw ang pagpadako sa kontrobersyal nga online video contents.
Matod niya, nigamit usab sila og analytics aron masuta kung unsang mga video ang ilang gamiton sa pagpakatap sa mga bakak nga impormasyon nga gitumong sa pagguba sa usa ka kandidato.
Gipasabot niya nga ang Advanced Persistent Threat Groups nga gihisgotan kay dili ordinaryo nga mga grupo nga nagsugod sa gagmay nga mga pag-atake sa pag-hack, apan ang ilang hulga adunay potensyal nga makaapekto sa tibuok nasud.
Gumikan niini, gipahimangnoan sa undersecretary sa departamento ang publiko nga dili dayon mo-click o mo-react sa mga post nga ilang makita online tungod kay matud niya, pipila niini gituyo nga ipakatap sa nagkadaiyang social media platforms aron lang makuha ang atensyon sa usa ka indibidwal.
