MANDAUE CITY- Miulbo ang usa ka dakong sunog sa Sitio Papaya, Barangay Ibabao-Estancia sa dakbayan sa Mandaue gabie Biyernes, Marso 7, 2025.
Base sa eksklusibong pakighinabi sa Bombo Newsteam kang Fire Officer 1 Neil Amancio, ang Lead Investigator sa Mandaue City Fire Office (MCFO) nga gikatahong unang nareport ang sunog pasado alas 7:19 sa gabii dayon ila kining gi-verify sa ilang 360 degrees firewatch camera hinungdan nga daling giisa ang 1st Alarm Status pag alas 7:20 sa gabii.
Tungod sa kadako sa maong sunog gipasaka kini sa 2nd Alarm Status pag-abot sa alas 7:30 sa gabii.
Gumikan sa hiniusang pagtinabangay sa pagresponde sa mga sakop sa MCFO uban sa mga barangay fire brigades ug volunteers kay nadeklara kini nga ‘fire under contro’l alas 8:03 sa gabii ug fire out pag-abot sa alas 8:23.
Sa pikas bahin, daling mihatag og hinabang ang buhatan sa Mandaue City Social Welfare Services (CSWS) sa mga biktima sa sunog nga matod pa muabot sa dili muminos 50 ka mga panimalay ang naugdaw sa insidente nga nakawala sa pinuy-anan sa kapin 500 ka mga indibidwal.
Maayo nalang kay walay natalang naangol sa maong sunog kung diin sa pagkakaron kay padayon pa ang gilusad nga imbestigasyon sa mga kabumberohan sa posibling hinundan niini.
