CEBU CITY-Nadakpan na sa mga sakop sa tigpatuman sa balaod ang suspek sa pagpusil-patay sa Sitio Lower Gochan sa Barangay Quiot Pardo ning dakbayan sa Sugbo niadtong Biyernes sa gabii, Marso 7, 2025.
Giila ang suspek nga si Jimbo Baring Valencia, 39-anyos, ug lumulupyo sa Purok Kojic, Barangay Tangke sa dakbayan sa Talisay.
Samtang ang biktima kay si Junjay Abay Panimdim nga silingan ra sa dinakpan.
Nasikop kini sa mga Cebu City Police pinaagi sa usa ka manhunt operation niadtong Dominggo sa sayong buntag, Marso 9.
Gikumpirmar kini ni Police Lt Col Maria Theresa Macatangay ang Deputy City Director for Operations sa Cebu City Police Office (CCPO) atol sa eksklusibong pakighinabi sa Bombo Newsteam diin ang mga sakop sa Labangon Police Station 10 ang nakasikop sa suspek human gitaho nga miuli kini sa iyang panimalay sa samang barangay.
Dugang sa opisyal nga nailhan ang suspek tungod sa pag-backtracking sa mga kapulisan sa CCTV footages sa maong dapit ug impormasyon usab sa mga lumulupyo.
Gi-angkon sa suspek nga tungod sa lalis motorsiklo ang hinungdan sa ilang bikil nga miabot nga pagpangbahad hangtod sa gipusil sa suspek ang biktima.
Kasamtangang giandam na sa mga sakop sa kapulisan ang kasong murder batok sa suspek.
