CEBU CITY- Isip pagpangandam sa umaabot nga Lenten Season, si Police BGen Redrico A. Maranan, ang Police Regional Office-7 Regional Director, nag inspeksyon na sa nag-una nga transport hubs sa Central Visayas, lakip na ang Cebu South Bus Terminal, Cebu North Bus Terminal, ug ang Sea Pier. Kini, buot masiguro ang kaluwasan, seguridad, ug hapsay nga pagbiyahe sa publiko atol sa pag-obserbar sa Semana Santa.
Ang maong inspeksyon may kalabot kini sa tibuok nasud nga “Ligtas SumVac 2025” nga kampanya sa Philippine National Police, nga nagtutok sa pagpausbaw sa police visibility, paghupay sa krimen, ug pagresponde sa emerhensya atol sa gipaabot nga pagdagsa sa mga pasahero nga mobiyahe sa ilahang mga probinsya.
Personal usab nga gisusi ni Police BGen Maranan, kabahin sa kaandam sa mga security personnel ug gisusi ang set-up sa police assistance desks, traffic coordination points, ug monitoring posts niining mga dapit nga bug-at ang trapiko.
Subay niana, iyang gikompirma nga ang tanan nga mga resources sa PRO-7, gitugyan na alang sa mga operasyon nga ipahigayon karong semanaha.
Kini, naglakip sa hingpit nga pagpadala sa mga personnel, mobile patrol units, K-9 teams, ug mga tactical drone aron mahatagan ang real-time nga aerial monitoring sa mga pampublikong lugar.
Ang mga drone gigamit aron mapauswag ang pagkahibalo sa sitwasyon ug makatabang sa paspas nga pagtubag, labi na sa daghang mga tawo ug mga lugar nga lisud maabot.
Giila usab ni Police BGen Maranan ang suporta sa mga partner agencies sama sa Philippine Drug Enforcement Agency (PDEA), nga nagpahigayon og on-the-spot drug testing sa mga bus driver aron masiguro ang kaluwasan sa mga sumasakay sa layo nga biyahe.(Bombo Irene Ardiente)
