CEBU CITY- Nagmalinawon ang pag-obserbar sa Huwebes Santo kagahapong adlawa Abril 17, 2025 sulod sa Dakbayan sa Sugbo sumala pa sa Cebu City Police Office (CCPO).
Kini ang gitaho ni Police Lt Col Maria Theresa Macatangay, ang Deputy City Director for Operations sa CCPO pinaagi sa eksklusibong pakighinabi sa Bombo Radyo Cebu Newsteam.
Kun diin matod pa ni Macatangay nga “generally peaceful” ang tibuok dakbayan sa Sugbo nga nanukad gikan sa taho sa ilang mga police stations ug mga monitoring teams nga gipakatap subay sa pag-obserbar sa Semana Santa.
Gani anaa silay gitugyan nga mga Special Deployment Teams nga gipakatap sa mga dapit nga adunay dakong pundok sa tawo sama nalang sa mga religious centers ug mga simbahan.
Ang mga Special Deployment Teams, taman sa Dominggo sa Pagkabuhi (Easter Sunday) Abril 20 nga nagtimaan sa pagtapos sa Semana Santa.
Gani nagpadayon nga naka-heightened alert sa estado sa CCPO subay sa panahon sa Kwaresma og sa unang bahin sa panahon sa ting-init (Summer Season).
Ingon man nga pahimangno sa opisyal sa kapulisan sa publiko ilabi na walay tawo nga mabilin sa ilang panimalay nga itugyan sa kasaligan nga silingan ang balay, pag-obserbar sa mga personal safety and security measures sama sa pagdili dayon mag-post online sa mga lugar nga gilakwan, ug siguradohong naka-lock ang pultahan ug bintana aron dili masulod sa mga potensyal nga kawatan.
