Gisuspenso sa Land Transportation Office (LTO) ang lisensya sa driver nga nalambigit sa fatal accidents sa Ninoy Aquino International Airport (NAIA) niadtong Domingo sa buntag.
Gimando usab sa Department
of Transportation (DOTr) ang ipaubos sa drug testing ang maong driver.
Matod sa LTO, temporaryong gisuspinde sulod sa 90 ka adlaw ang driver’s license samtang giimbestigahan ang insidente.
Basi sa Anti-Drunk and Drugged Driving Act of 2013, ang mga drayber nga nalambigit sa disgrasya obligado nga mopaubos sa chemical testing, lakip na ang drug screening ug kon gani mobalibad sila, mahimong matangtang ang ilang lisensiya ug mahimo silang pamultahon.
Nasayran nga duha ka tawo ang namatay sa aksidente, usa ka 28-anyos nga lalaki ug singko anyos nga bata dihang gidaro sa usa ka SUV ang departure area sa NAIA Terminal 1 samtang tulo pa ang naangol ug gidala sa tambalanan.
Unang gikumpirmar sa DOTr nga dili tinuyo ang nahitabong aksidente basi sa inisyal nga imbestigasyon ug CCTV footage.
Sumala pa nga naghakot og pasahero ang driver nga giilang si Leo Gonzales sa wala pa gidaro sa SUV ug niingon nga nataranta na lang kini kay adunay sakyanan nga milabang sa karsada ug imbes nga pangpreno, iyang natumban ang accelerator.
Subay niini, mipasalig si Department of Transportation Secretary Vince Dizon nga abagahon sa kompanya ang gasto sa pagpatambal sa mga naangol ug pagpalubong sa namatay ug nanawagan kini sa publiko nga respetuhon ang mga biktima ug likayan ang pag-post sa mga sensitibong video o litrato sa insidente sa social media aron lang modaghan ang mga views.
