Buot ug tumong ni Mayor-Elect Nestor Archival ang mananom og mga kahoy nga mokabat sa gidaghanon nga 250,000, ngadto sa bukirang bahin sa Dakbayan sa Sugbo sulod sa iyahang 3 ka tuig nga termino isip bag-ong pangu sa Sugbo, kay nabutyag niya, nga ang pagpananom og mga kahoy, duol sa iyahang kasing-kasing.
Isip kabahin sa Environmental Advocacy, mao kini ang gipadayag ni Archival sa kadaghanan atol sa “World Environment Day” nga gipahigayon sa Plaza Independencia ning syudad sa Sugbo.
Gitataw sa Mayor nga isip pasidungog sa mga tawo nga ningbotar sa iyaha sa 2025 election, diin nakakuha kini og kapin sa 250,000 ka mga boto.
Dugang niini nga sugdan na ang pagpananom og kahoy labing sayo karong Agusto, kanus-a panahon na sa ting-uwan.
Subay sa iyang plano, buot usab niyang manampit sa mga buhatan nga maka-abag kaniya susama sa Metro Cebu Water District (MCWD), Department of Environment and Natural Resources(DENR), Department of Agriculture, ug City Agriculture Department, alang sa pagpangyawat nga aduna kini mga seedlings o liso.
Ingon man nga makig-istorya usab siya sa mga kapitan sa bukirang mga barangay aron mahibalo kung asa mahimong mananom og mga kahoy. | Bombo Irene Ardiente
