Nunot sa paspas nga aksyon ni Presidente Ferdinand R. Marcos Jr. sa krisis sa kuryente sa Siquijor, gipasiugdahan usab niini ang mga lakang aron moluag ang trapiko sa San Juanico Bridge nunot sa gihimong rehabilitation niini.
Busa, ang Presidente, personal nga nibisita sa San Juanico Bridge aron sa pagsusi ug pagmando sa pagpatuman sa mga solusyon aron dili madugay ang mga pagkalangay sa mga transakyon niini.
Ang mga sugyot nga solusyon mao ang sa pagdugang og ramp, ubay-ubay nga truck trips, ug pagtugot sa night navigation sa RoRo vessels, diin kining tanan, nagtumong sa pagpadali sa biyahe ug pagsiguro sa kaluwasan sa mga magpapanaw.
Kahindoman nga gideklarar ni Marcos ang state of calamity sa Eastern Visayas sulod sa mga usa ka tuig aron mapadali ang pag-ayo ug rehabilitasyon sa San Juanico Bridge ug maminusan ang epekto sa mga residente sa Samar ug Leyte, diin nagsugod kini niadtong Hunyo 5, 2025.
Ang 2.16-kilometros nga San Juanico Bridge nagsilbing bugtong permanenteng sumpay sa yuta tali sa mga isla sa Samar ug Leyte ug usa ka importanteng bahin sa Pan-Philippine Highway (Maharlika Highway/AH26), nga nagdugtong sa Luzon, Visayas, ug Mindanao. | via Bombo Irene Ardiente
