Gidala sa Department of Tourism (DOT) Soccsksargen ang ika-7 nga edisyon sa “Treasures of SOX: Travel and Trade Expo 2025” sa Cebu City aron tukion ang industriya sa turismo sa Sugbo ug madani ang mga Sugbuanon sa pagsuhid sa Rehiyon 12 sa Mindanao.
Ang maong kalihokan gibaton na matag tuig, diin agtumog kini sa promosyon sa turismo nagpakita sa labing maayo sa rehiyon sa Soccsksargen, lakip ang mga talan-awon, adunahan nga kultura, mga bahandi sa culinary, ug mga nagkadayang destinasyon.
Gipasiugdahan kini sa DOT sa pakigtambayayong sa mga local government units, national government agencies, tour operators, ug Micro Small and Medium Enterprises (MSME’s).
Inubanan sa 29 ka mga exhibitors, nagpakita kini sa usa ka mix sa mga travel packages, regional delicacy, handicrafts, ug uban pang turismo nga mga produkto ug serbisyo.
Nag-ingun ang Regional Director sa DOT Soccsksargen nga si Nelia R. Arina, ang tumong sa pagpadala sa “Treasures of SOX” nganhi sa Sugbo usa ka estratehikong lakang aron maka-access sa bag-ong mga merkado ug makamugna og panag-uban sa mga stakeholders sa turismo.
Diin, gikonsiderar niini ang Sugbo isip usa ka nag-unang merkado alang sa mga rehiyon sa turismo nga nangitag mas dakong panglantaw sa turismo, pagpalapad sa merkado, ug trapiko sa mga turista.
Gipadayag usab ni Arina ang pagkamalaumon nga ang DOT Soccsksargen makadani ug dugang nga educational tours ug bag-ong travel ug tour packages gikan sa Cebu ngadto sa Soccsksargen, ilabi na human ang English as a Second Language nga mga eskwelahan nagpakita og interes sa diving destinations sa probinsiya.
