LAPU-LAPU CITY,CEBU- Nanawagan og hustisya ang pamilya sa usa ka taxi driver nga napalgang gipusil patay sulod sa iyang sakyanan sa Barangay Mactan, dakbayan sa Lapu-Lapu Miyerkules, Hulyo 2, 2025.
Giila ang biktima nga si Johnny Burdas, 47-anyos, residente sa Barangay Bankal, dakbayan sa Lapu-Lapu.
Matod ni Police Lieutenant Colonel Christian Torres, ang tigpamaba sa Lapu-Lapu City Police Office nga ang mga residente nakadungog og tulo ka buto sa armas mga ala 1 sa kaadlawon.
Apan naamgohan na lang nila nga adunay dili maayong butang dihang namatikdan nila nga adunay buslot sa bentana sa drayber ug nanawag sa mga otoridad.
Ang drayber adunay duha ka samad pinusilan, usa sa ulo ug usa sa dughan. Duha ka basiyo sa bala sa kalibre .45 nga armas ang nakit-an tapad sa sakyanan, nga posibleng gigamit sa krimen.
Gidugang ni Torre, nga ang surveillance footage gikan sa duol nga establisemento nagpakita nga ang taxi nga milabay mga ala 1:22 sa kaadlawon, mihunong nga nagsiga ang hazard lights sa wala pa mipaingon sa usa ka bakanteng lote, sa samang dapit diin si Burdas napalgang patay.
Sa pakighinabi sa Bombo Newsteam, si Clara Burdas—ang asawa sa biktima—mitino nga milakaw ang iyang bana kagabii human nga mitingog ang iyahang sa cellphone kay adunay booking nga pasahero, ug mao to ang pinaka-ulahi niya kini nga nakita.
Iyang gidugang nga samtang anaa siya sa ilang balay, nakadawat siya og tawag gikan sa iyang ayaan nga mipahibalo sa trahedya. Diha-diha, mianha siya sa lugar kauban ang ilang duha ka anak, apan ilang nasayran nga gidala na ang lawas sa iyang bana.
Nagtuo usab sila nga posibleng gitulis ang iyang bana sanglit nawala ang iyang cellphone ug pitaka.
Hangtod karon, padayon ang masusi nga imbestigasyon sa kapulisan ug nagpahigayon usab sila og backtracking sa rota sa taxi ug nagsusi sa ubang available nga CCTV footage sa paglaom nga mailhan ang suspek.